«Өрөгөй» Спорка бэлэмнэнии киинигэр Саха Өрөспүүбүлүкэтин национальнай многоборьеҕа федерациятын бастакы Кубогар күрэхтэһии ыытылынна.
Манна Амма, Бүлүү, Чурапчы, Нам, Мэҥэ Хаҥалас, Кэбээйи, Уус Алдан, Таатта үстүү кыттааччылаах хамаандалара күөн көрүстүлэр. Кинилэр Үс төгул үс ыстаныыга, Тутум эргииригэр, хапсаҕайга, мас тардыһыытыгар уонна сүүрүүгэ ким күүстээҕин, сымсатын, быһыйын быһаарыстылар.
Онуоха көрүҥнэринэн түмүк маннык буолла:
Үс төгүл үскэ – 1. Кэбээйи, 2. Нам, 3. Чурапчы.
Тутум эргииригэр – 1. Кэбээйи, 2. Амма, 3. Мэҥэ Хаҥалас.
Хапсаҕайга – 1. Кэбээйи, 2. Мэҥэ Хаҥалас, 3. Чурапчы.
Мас тардыһыыга – 1. Мэҥэ Хаҥалас, 2. Кэбээйи, 3. Амма
Эстафетаҕа – 1. Амма, 2. Чурапчы, 3. Нам.
Бүтэһиктээх түмүккэ күүстээх састааптаах Кэбээйи (Алексей Уваровскай, Артём Дьяконов, Яков Дмитриев) боотурдара бастаатылар. Иккис миэстэни Амма хамаандата (Леонид Филиппов, Тимофей Большаков, Дмитрий Шестаков) ылла. Үһүс бириистээх миэстэҕэ Мэҥэ Хаҥалас спортсменнара (Давыд Колесов, Арсен Федоров, Дамир Попов) таҕыстылар. Салгыы миэстэлэри Чурапчы, Нам, Уус Алдан, Бүлүү, Таатта уолаттара ыллылар.
Кыайыылаахтарга харчынан бириискэ Туоһу суруктар, туһааннаах кубоктар, мэтээллэр туттарылыннылар. Бастакы холонуу үчүгэйинэн сыаналанна. Онон саха төрүт көрүҥнэригэр саҥа, дьоһун күрэхтэһии баар буолла.
«Дьулурҕан».
ПОДЕЛИТЬСЯ: