// Ох саанан ытыы спорда төрүттэммитэ 60 сылыгар
Төрүттээччи – Павел Михайлович Стасов… Кини аата 70-80-сылларга Улуу тренер Дмитрий Петрович Коркины кытта тэҥҥэ ааттанара. Иккиэн биир кэмҥэ аатырар Чурапчы оскуола-интэринээтигэр бииргэ үлэлээбиттэрэ. Павел Михайлович тренерскэй олоҕо син эмиэ Дмитрий Петрович Коркин курдук уустуктардаах этэ. Бу кини кимиэхэ да майгыннаабат ураты туспа суола этэ. Ол оннук хатыламмат ураты суоллаах-иистээх тренеринэн буолар.
Павел Михайлович, 25 ССРС уонна Россия спордун маастардарын иитэн бэлэмнээн таһаарбыта. Кини иитиллээччилэрэ 24 төгүл Россия, «Урожай», «Спартак» Киин Сэбиэттэрин чемпионнарынан буолбуттара. 6 төгүл Сэбиэскэй Сойуус Сэбилэниилээх Күүстэрин чемпионнарынан, 27 төгүл Дальнай Восток уонна Сибиир, 70 төгүл Саха сирин кыайыылаахтарынан тахсыбыттара. Кэргэнэ Тамара Спиридоновна 25 сыл тириэньэр ыстаастаах үрдүк категориялаах тренер этэ.
Хаҥаластааҕы Оҕо спортивнай оскуолатыттан Саха сирин, Россия, Европа чемпионнара, призердара, ол иһигэр норуоттар икки ардыларынааҕы кылаастаах спорт маастардара Павел Мартынов, Айаал Адамов, РФ спордун маастардара Юля Маркова, Павел Алексеев-Стасов, Владик Васильев, Юлиана Колесова, спорт маастарыгар кандидаттар Сардаана Дьячковская (Адьютантова), Бэргэн Алексеев, Саина Громова, Даниил Винокуров, Тимур Соловьев, Андрей Архипов иитиллэн, үүнэн-сайдан тахсыбыттара уонна ситиһиилээхтик үлэлииллэр, күрэхтэһэллэр.
Сахабыт сиригэр ох саанан ытыы спорда төрүттэммитэ 60 сылыгар, оноҕосторо кыырайа көтөн сыалларын табан, дьулурҕатык иннилэрин диэки баран иһэллэр. Оҕунан ытыы улууспутугар хайдах салаллан-сайдан иһэрэ, быһаччы ох саанан ытыы спордун төрүттээбит, сайыннарбыт Павел Михайлович уонна Тамара Спиридоновна Стасовтар дьоһуннаах олохторун, үлэлэрин, ыра санааларын кыыстара XX үйэ саамай элбэх титуллаах оҕунан ытааччыта Анна Павловна Алексеева-Стасова, күтүөттэрэ анал үрдүк үөрэхтээх тренер, өрөспүүбүлүкэ элбэх төгүллээх кыайыылааҕа, Саха Өрөспүүбүлүкэтин үтүөлээх тренерэ Михаил Валериевич Алексеев уонна сиэннэрэ үгүс-элбэх күрэхтэһиилэр чемпионнара, Россия спордун маастара «Азия оҕолоро» норуоттар икки ардыларынааҕы оонньуулар кыайыылаахтара, Россия бастыыр иһин күрэхтэһии кыайыылааҕа уонна призера Павел Алексеев-Стасов, спорт маастарыгар кандидат, элбэх төгүллээх оҕолорго Россия күрэхтэһиитин призера Бэргэн Алексеев салгыыр спортивнай олохторугар көстөр.
Уйбаан УЙГУУРАП.
Покровскай, Хаҥалас.
ПОДЕЛИТЬСЯ: