Турцияҕа, Анталияттан 130 км ыраах Бурдур куорат таһыгар, Агдаг хайаларыгар альпинизм, скайраннинг көрүҥэр Аан дойду Кубогар күрэхтэһии ыытылынна.
Бу «SAGALASSOS SKYRACE» Аан дойду түһүмэҕэр киирэр «SKYRUNNING WORLD SERIES» күрэхтэһиигэ альпинизмҥа Россия сүүмэрдэммит хамаандатын чилиэнэ, спортивный туризмҥа Россия уонна альпинизмҥа (скайраннинг) Россия спордун маастара, биһиги биир дойдулаахпыт Эрхан Бысыин ситиһиилээхтик кытынна.
Сүүрэр суолга аан дойду араас дойдуларыттан кэлбит 63 спортсмен таҕыста. Эрхан 27 км дистанцияҕа, 1700 м үрдүктээх хайаны дабайыыга – 4 чаас 06 мүн. 21 сөк. бириэмэни көрдөрөн, 63 спортсментан 8-с бириистээх миэстэҕэ таҕыста.
Эрхан бу ситиһиитинэн Аан дойду Кубогын 10 бастыҥ скайраннердарын кэккэлэригэр киирдэ. Биир дойдулаахпытын бу дьоһун ситиһиитинэн эҕэрдэлиибит!
“Дьулурҕан”.
ПОДЕЛИТЬСЯ: