Саха норуотун биир халбаҥнаабакка тутуһар үгэһэ – хардарыта көмөлөсүһүү буолар. Покровскай куорат тэрилтэлэрин эр дьоно, аҕалар анал байыаннай дьайыыга сылдьар байыастарбыт дьиэ кэргэттэригэр анаан бу күннэргэ муус ыллылар. Этэргэ дылы, муус ылыыта үтүө үгэспит, төрүт дьарыкпыт буоллаҕа.
Инники кирбиигэ сылдьар дьоммут дьиэ кэргэттэригэр көмөлөһөр сыаллаах бу тэрээһиҥҥэ үгүс тэрилтэлэртэн биир бастыҥнарынан, Арассыыйа Социальнай пуондатын Хаҥалас улууһугар баар килийиэн сулууспатын (салайааччы М.П. Васильева) үлэһиттэрэ буоллулар. Үлэ саҕаланыытыгар кэтэһэн турбакка, сып-сап туттан Пенсияны аныыр отдел салайааччыта Александр Сергеев муус ылыллыахтаах чардаатын, сытыы анньыытынан алларан барда. Онтон тэрилтэ иһинэн аҕалар сүбэлэрин бэрэссэдээтэлэ, хаһаайыстыба сэбиэдиссэйэ Николай Соколов, «Штиль» эрбиинэн эрчимнээхтик халыҥ мууһу эрбэтэн үлэни сыыдамсытта. Өр-өтөр буолбакка килийиэннэри кытта үлэлиир салаа исписэлиистэрэ Юрий Игнатьев, Урсун Трофимов, итини таһынан хаһаайыстыбаннай салаа үлэһиттэрэ Сергей Новиков, Тимофей Кириллин, Иван Уйгуров мууһу чардааттан анал тэрилинэн хостоон кытыл диэки үтэн илдьэн истилэр.
Тута уопуттаах суоппар Юрий Шеин УАЗ массыынатын тэлиэгэтигэр дьэҥкир ыраас муустары тиэйэ охсон, анал байыаннай дьайыы кыттыылаахтарын дьиэ кэргэттэригэр тус аадырыстарыгар илдьэ барда. Ити курдук үлэ күөстүү оргуйда. Ылыллыбыт мууһу таһыыга итини сэргэ, Ветеринарнай управление (начаалынньык А.В. Николаев), Олорор дьиэ-уот хомунаалынай хаһаайыстыбатын Хаҥаластааҕы филиалын (дириэктэр Д.В. Николаев), Спорт дыбарыаһын (дириэктэр О.И. Иванов) уонна куораппыт дьаһалтатын (баһылык П.П. Гермогенов) массыыналара биир кэм тохтоло суох сүүрдүлэр.
Үлэ күн устата биир ситиминэн тохтоло суох барда. Мууһу таһаарыы, сааһылаан ууруу, тимир көлөлөргө тиэйии, тустаах ыалларга тиэрдии тэтимнээхтик ыытылынна. Бу күн үлэ хара сарсыардаттан саҕаланан баран, киэһээҥҥэ дылы үлэлээннэр туһааннаах ыалларга, 31 аадырыска муус тиэрдилиннэ. Биир былааннаммыт үлэ туолла. Килийиэн сулууспатын килбиэннээх үлэһит дьоно, үлэлэрин тэҥэ үтүө санааларынан дьоһуннаах үлэни толордулар.
Уйбаан УЙГУУРАП, общ.корреспондент
ПОДЕЛИТЬСЯ: