Улуус баһылыгын солбуйааччы Руслан Игнатьевич Захаров салайааччылаах бөлөх Игидэйгэ кэлэн үлэлээн барда. Кинилэр Игидэй нэһилиэгин дьаһалтатын үлэһиттэрин, нэһилиэк бары тэрилтэлэрин салайааччыларын, нэһилиэк Сэбиэтин депутаттарын, нэһилиэк активын кытта көрсүстүлэр.
Сүрүн боппуруоһунан, эһиил от ыйын 7-12 күннэригэр Тааттабытыгар ыытыллар XXII Манчаары оонньууларыгар бэлэмнэнии үлэлэр хаамыыларын туһунан сырдатыы, санаа атастаһыыта; Манчаары оонньууларын фондатын үлэтин туһунан иһитиннэрии буолла.
Култуура салаатын салайааччы Гаврил Гаврильевич Вырдылин: «Оонньуулары ордук, үөрүүлээх аһыы, сабыы тэрээһиннэрэ киэргэтиэхтээх. Концепцията оҥоһуллубута. Сүрүн режиссёрунан биир дойдулаахпыт Р.Р. Дорофеев ананна. М.Степанов официальнай чаас режиссёра, Т.Егорова сценарист. Кылаабынай хореограф бэйэбит уолбут Валентин Козлов. Режиссердар бэйэлэрэ бөлөхтөөхтөр. Ол салайааччытынан Валентина Бурнашева буолла. Мин оперативнай штаб диэн баар, онно солбуйааччы буоллум.
Аһыллыыларга элбэх киһини хамсатыахтаахпыт. Балтараа тыһыынча киһини, итинтэн 600-тэ оҕо. Ол иһин квоталаатыбыт. Игидэй нэһилиэгэ улахан нэһилиэктэргэ киирэр. Үҥкүүгэ 12 уолу, 12 кыыһы көрдүүбүт. Ыччаттарга алта паараны. 25 эр киһини, 25 дьахтары.
Үөрэх салаатын кытта кэпсэтэн олоробут. Оҕолор лааҕырдыахтара. Икки нэдиэлэ кэмҥэ репетициялар буолуохтара. Аһыллыыларга кыттар чиэс-бочуот. Куораттан 200-тэн тахса артыыс кэлиэҕэ. Массовканы бэйэбит оҥоробут. Олунньуттан фестиваллар буолуохтара.
Манчаары оонньууларын гимнигэр конкурс биллэрдибит. Хор ыллыаҕа бастакытын уонна сомоҕолоһуу оһуохайынан түмүктүөхпүт. 50 саамай активнай дьоҥҥутун илдьэҕит. Улахан дьоҥҥо, оҕолорго курдук лааҕыр диэн суох.
Сувенирнай бородууксуйаҕа эмиэ эппиэттээхпит. Атыы-эргиэн барыаҕа. Пааркаҕа тутуу барар. Норуот уус-уран оҥоһуктарынан барабыт. Лавкалар баар буолуохтара. Дэбдиргэ уустара, иистэнньэҥнэрэ бары биллэр дьоннор. Түгэни мүччү тутуохтара суоҕа. Ону таһынан Хадаайыга түһүлгэбитин оҥостор былааннаахпыт. Отут тыһыынча киһи кэлээри олорор. Биһиги нэһилиэнньэбит 17 тыһыынча. Барыларын үчүгэйдик көрсөн, атааран ыытыахтаахпыт», — диэн Дэбдигэҕэ буолбут көрсүһүүгэ эттэ.
Олохтоохтору кытта сүрдээх истиҥ кэпсэтиһии буолла. Хамыыһыйа дьоно үгүс боппуруостарга эппиэттээтилэр.
Суруйда: Гизелла ПОПОВА.
Таатта, Дэбдиргэ.
ПОДЕЛИТЬСЯ: