“Забота-Арчы” хаһыат үлэһиттэрин көҕүлээһининэн “Амарах хаһыат, алгыстаах туһулгэтэ” диэн тэрээһин Кулаковскай киинигэр буолла. Маҥнайгытынан, хаһыат салайааччыта Виктор Эверстов үлэтин туһунан билсиһиннэрдэ.
Ол кэнниттэн эдэр кыргыттар Николаева Уйгулаана, Слепцова Олеся улахан бырайыак оҥороннор, саха тылын сайдар кэскилин туһугар үлэлэһэ сылдьалларын билиһиннэрдилэр. Кинилэр иккиэн студеннар эбит. Быйыл бүтэһик сыллара. Ол да буоллар, бу бырайыактарыгар үлэлэһэ сылдьаллар. Бу улахан ноҕуруусука. Инники өттүгэр олус кэскиллээх, туһалаах бырайыак эбит дии санаатым.
Салгыы, хоту дойду олохтооҕо Макар Курилов (Явункодэ) тус бэйэтин олоҕун-дьаһаҕын туһунан кэпсээтэ. Кини арыгы диэн дьааттан арахсан, хоту дойдуга тиийэн биир сыл олорон, санаата тосту уларыйан кэлбитин кэпсээтэ. Хоһоон суруйар буолбут. Туундараттан өй-санаа өттүнэн уларыйбыт, тосту атын киһи буолбут. Самодеятельность кинитэ суох буолбат, барытыгар кыттар эбит.
Кини бэйэтин туһунан киинэ оҥорбут. Онно балыктыы сылдьара, таба көрөрө, кутааҕа аһын буһарара, тордуохх аһыы олороро, киэн нэлэмэн туундара көстөр. Ол барыта биһиэхэ, дойду дьонугар наһаа дьикти, учугэй кэрэ көстүү.
Макар Курилов бүтэһигэр, бэйэтин омугун тылынан дьүкээгирдии уонна нууччалыы ырыа ыллаата. Кини духовнай өттүнэн сайдыылааҕа көстөр.
Онтон бу тэрээһиҥҥэ кытта кэлбит Майа Ньургууната бэйэтин үлэтин билиһиннэрдэ. Кини ким эмтэниэн баҕалаахтарга офиһын аадырыһын биэртэлээтэ. “Айыҥа” духовнай киин (Билибин уул. 38/3).
Ити курдук мин “Забота-Арчы” хаһыакка суруттара кэлэммин, наһаа интириэһинэй тэрээһиҥҥэ сылдьан, үчүгэйдик сынньанан, үөрэн-көтөн дьиэбэр кэллим. Атыттары эмиэ бу хаһыакка суруттаралларыгар ыҥырабын.
Данилова Александра Егоровна, куорат олохтооҕо, үлэ бэтэрээнэ, СР доруобуйа харыстабылын уонна Атыы-эргиэн эйгэтин туйгуна.
ПОДЕЛИТЬСЯ: