Дьокуускай куоракка аан бастакытын сонуну киэҥник тарҕатар тэрилтэлэр икки ардыларыгар «Эбэ бэлэҕэ» муус аннынан күөгүнэн балыктааһын күрэҕэ ыытылынна. Тэрээһин «Ил Түмэн» хаһыат сахалыы таһаарыытын редактора Алексей Матвеев көҕүлээһининэн, «Ил Түмэн» издательскай дьиэ» кэлэктиибин тэрийиитинэн, СӨ Суруналыыстарын сойууһун өйөбүлүнэн ыытылынна. Күрэхтэһии үөрүүлээх арыллыытыгар СӨ Суруналыыстарын сойууһун бэрэссэдээтэлэ Олег Марков эҕэрдэ тылын эттэ, кыайыыны-хотууну баҕарда. Күрэхтэһии саҕаланыан иннинэ суруналыыстыка аксакаала Иван Иванович Ксенофонтов – Силиги уот оттон, үрдүк айыылартан көрдөһөн алгыс тылын анаата.
Тэрээһиҥҥэ уопсайа сэттэ хамаанда кэлэн күөн көрүстэ. Күрэхтэһии 3 түһүмэхтэн, 8 номинацияттан турда. Маҥнай утаа ким бастакынан балык хаптарарыгар куоталастылар. Хамаанда бэриллээтин кытары «Кыым» хаһыат 1-кы хамаандатын чилиэнэ Анатолий Стручков 3 мүнүүтэ иһигэр хостоон, дьону-сэргэни соһутта. Онтон хамаандалар 3 чаас устата ким элбэх балыгы ыларын иһин кииристилэр. Түмүктүүр түһүмэҕинэн балыксыт сэбин-сэбиргэлин сүкпүтүнэн 100 миэтирэҕэ сүүрүүгэ «Сахабэчээт» тэрилтэ хамаандатын чилиэнэ Ариан Григорьев атыттары ырааҕынан хаалларан бастакынан биэтэккэ тиийэн анал бириискэ тигистэ.
«Сахабэчээт» тэрилтэ икки хамаанданы туруоран сүүрүүгэ эрэ буолбакка саамай улахан уонна саамай кыра балыгы туттаран анал бириистэри ылары ситистилэр.
Наҕараадалары үөрүүлээх быһыыга-майгыга «Ил Түмэн» хаһыат шеф-редактора, СӨ Суруналыыстарын сойууһун бэрэссэдээтэлин солбуйааччы Галина Бочкарева туттарда.
Күрэхтэһии түмүгэ:
1 миэстэ — «Кыым» хаһыат 2-с хамаандата
2 миэстэ — «Сахамедиа»
3 миэстэ «Кыым» хаһыат 1-кы хамаандата
Тэрийээччилэр хас биирдии кыттааччыны, ыалдьыты итии чэйинэн, таба, балык миининэн, сахалыы алаадьынан, баахыланан, араас балык көрүҥүнэн күндүлээтилэр. Бэтэрээн суруналыыс Петр Томскай тоҥ балыгы кыһыыга маастар-кылаас көрдөрдө.
Хас биирдии кыттааччы үөрэн-көтөн, дуоһуйан, тэрийээччилэргэ махталларын тиэртилэр. Аны мантан ыла күрэхтэһии үтүө үгэскэ кубулуйан сыллата ыытыллар буоларыгар баҕа санааларын эттилэр.
Айтал Павлов
Хаартыскалар: Виктор Эверестов, Николай Васильев
ПОДЕЛИТЬСЯ: