Бу дьыл сэтинньи 5 күнүгэр Эмиэрикэ бэрэсидьиэнин быыбарыгар Дональд Трамп кыайан-хотон үрдүк үөрүүнү биллэ. Бу эдэр эрдэҕиттэн биисинэскэ ат арҕаһыгар сылдьыбыт миллиардер иккис төгүлүн бэлиитикэ саамай үрдүкү солотугар дураһыйбыта ситиһиилээх буолла. Уочаратын быһыытынан 45 нүөмэрдээх Эмиэрикэ бэрэсидьиэнэ Трамп билигин аны 47 нүөмэринэн эмиэ бэрэсидьиэн үрдүк аатын ылла. Дональд Трамп 1946 сыллаахха бэс ыйын 14 күнүгэр Нью-Йорка төрөөбүт киһи. Кинини аҕатын Фред өттүнэн ньиэмэс, онтон ийэтин Мэри өттүнэн шотландец хааннаах киһи дииллэр. Трамп быйыл оруобуна 78 сааһын туолбут. Онтон быйыл бүтэһигин бэрэсидьиэннээбит 81 саастаах Байден кырдьаҕас ардыгар тыраапка бүдүрүйэн, сороҕор ханна тыл этэ турарын умнан кэбиһээхтээн о.д.а. оҥорон аан дойду үрдүнэн күлүүгэ барбытын бары өйдүүбүт. Ол эрэн саастаах өттүбүт бүдүгүрэ кырдьан эрэр бэрэсидьиэн Байдены аһынара да баар буоллаҕа. Онуоха холоотоххо, Трамп өрө көрөн, туттан-хаптан билигин Байдентан чыҥха атын курдук көстөр. Уола хаан кыайыы-хотуу үктэллэнэн баран, бэл, үҥкүүлээн тибийэн үгүс киһини үөртэ-көтүттэ. Итинэн ити атаҕын үрдүгэр чэпчэкитик эргичийэ сылдьар «бумер көлүөнэ» (1945 сыллаахтан 1964 с. диэри төрөөбүттэр) биир чаҕылхай бэрэстэбиитэлэ бэрэсидьиэн Дональд Трамп үгүс киһиэхэ инникигэ эрэли үөскэттэҕэ. Төһө да аан дойду үрдүнэн 75 саастан ыла кырдьаҕас диэн этэрээккэ киллэрбиттэрин иһин, 78 саас диэн саас буолбатаҕын Трамп дакаастаата. Ити дьоһун сааска өссө да төһө баҕарар сайдар кыах баарын, олорон кэлбит олох уоппута уонна саҥа сайдыыны кэрэхсээһин холбостохторуна үтүө түмүгү биэрэрин өйдөөн дойдуну салайар уустук муоһаны быыбардааччылар итэҕэйдэхтэрэ. Онон икки атах үйэтэ уһаабытын туоһутунан буолбут 78 саастаах Дональд Трамп курдук чэгиэнник-чэбдиктик сылдьар туох куһаҕаннаах буолуой?
Н.Ильина
ПОДЕЛИТЬСЯ: