Сахалар биир саамай ытыктыыр, сүгүрүйэр ыйбыт – баай Байанай ыйа үүммүтүнэн эҕэрдэлээн туран, саха киһитэ кыстыыр аһын-үөлүн хаһаанарын кэриэтэ, өйү-санааны, ис туругу байытан, бөҕөргөтөн, аам-даам тымныылаах кыһыммытын этэҥҥэ туоруурга олук уурунаргытыгар баҕарабыт.
Ыччат саха тылын билбэт диибит, ол гынан баран бааллар эбээт, төрөөбүт тылы сайыннарыан, үөрэтиэн-билиэн баҕалаах оҕолор. Кинилэри кытта бу күн «Алгыстаах түһүлгэҕэ» көрсүөххүт. 2024 сыл тохсунньутугар интернет ситимигэр саха тылын үөрэтэр түһүлгэни тэрийбит Николаева Уйгулаана, Слепцова Олеся, Хотугулуу-Илиҥҥи федеральнай университет магистраннарын кытта күннээҕи олоххо саха тылынан саҥарыы нуорматын туһунан ирэ-хоро ырытыһыахпыт. Ити кэнниттэн 54 сааһыгар олоҕун тосту уларыппыт удьуор табаһыт Макар Куриловы- Явункодэны кытта юкагир тылын эйгэтигэр киирэн, норуот ырыаларын истиэхпит уонна хотугу норуоттар тустарынан киинэттэн быһа тардыылары көрүөхпүт.
«Алгыстаах түһүлгэбит» түмүктүүр түһүмэҕин ыалдьытынан норуот эмчитэ, өбүгэ суругун-бичигин этитиитинэн эмтиир Удаҕан, саха норуотун руническай суруктарыгар рунолог-практик, элбэх оҕолоох күн-күбэй ийэ, хаһыаппытыгар амарах сурутуу акциятын кыттыылааҕа Ньургууна Фёдорова-Мэҥэ Ньургууната буолуоҕа. Ураты дьарыктаах, айылҕаттан айдарыылаах эдэр дьахтар саха норуота уһуктарын, итэҕэли ылынарын туһугар үлэлиир, дьон-сэргэ итэҕэл көмөтүнэн сааһыланыа, үрдүк таһымҥа тахсыа диэн этэр.
Бу хас биирдиибитигэр туһалаах көрсүһүүгэ кэлэн, алгыстаах түһүлгэҕэ кыттаргытыгар ыҥырабыт.
Буолар кэмэ: сэтинньи 12 күнэ, 15.00 чаастан.
Буолар сирэ: Өксөкүлээх Өлөксөй аатынан Норуоттар доҕордоһууларын киинин (Дьокуускай к. Поярков уул., 4), аччыгый саалатыгар.
Түһүлгэҕэ киирии республикатааҕы «Забота-Арчы» хаһыакка сурутуунан. Сурутуу сыллааҕы сыаната (12 ыйга) — 911 солк. Хас биирдии кэлбит ыалдьыкка – бэлэх.
Миэстэ аҕыйах, онон 8-914-292-98-97, 8-914-272-14-22, 8-914-276-40-87 тел. билсэн, хаһыакка эрдэттэн суруйтаран, умнуллубат түһүлгэ мааны ыалдьыта буоларга тиэтэйиҥ!
ПОДЕЛИТЬСЯ: