Строительнай уокуруг ветераннарын сэбиэтин өйөбүлүнэн орто анал үөрэхтээһин ветераннара мустан 2016 сыллаахха Анна Афанасьевна Никифорова тэрийиитинэн искибиэр аһыллан, араас эгэлгэ сибэккилэри, мастары олордон саҕалаабыттара. Искибиэр туһунан Анна Афанасьевналыын көрсөн кэпсэттим.
Анна Афанасьевна бэйэҥ тускунан уонна туох санааттан бу искибиэр аһарга санаммыккыный?
— Томпо улууһун Кириэс Халдьаайы оскуолатын бүтэрбитим. Оскуола кэнниттэн ЯГУ-га биолого-географическай факультетка үөрэммитим, 4 курска үөрэнэ сылдьаммын кэргэммин Никифоров Михаил Гаврильевичтыын ыал буолан, үөрэхпитин 1972 сыллаахха бүтэрэн бараммыт, Чурапчыга Кытаанах орто оскуолатыгар учууталынан ананан 4 сыл, онтон Мындаҕаайыга эмиэ 3 сыл үлэлээн баран Чурапчытааҕы СПТУга №13,16 сыл устата үлэлээбиппит. Ол кэнниттэн 1995 сыллаахха Дьокуускайдааҕы педколледжка Николай Григорьевич Худолий тэрилтэтигэр ыҥырыллан үлэбитин саҕалаабыппыт. Кэлээт да Айаана творческай студия тэрийэн: иис сыаҕын аһан, үҥкүү таҥаhын тигэртэн саҕалаан, куукула да оҥорорго ылсыбыппыт. Куукула оҥороммут Дальне-Восточнай регионунан выставкаларга сылдьан дьону соһуталаан турардаахпыт. Ити курдук, үлэ үгэнигэр сылдьаммын 2016 сыллаахха үлэбиттэн тохтообутум. Төһө да бүттэрбин грант сүүйэн кыайан куукула оҥоруутугар хатырыгы оргутан кырааскалыыр этибит, оннук курдук аны ландшафнай, декоративнай дизайҥа туттан барбыппыт. Холобур, клумбалары киэргэтэргэ, сибэкки үүммэт сиригэр эбэтэр олордубут мастарын төрдүгэр хатырыгы куталларын Финдляндияҕа бара сылдьан көрбүтүм, кинилэр хатырык сииги тутарын уонна сыыс от үүммэтин сыалыттан тутталлар эбит.
2016 сыллаахха Азия оҕолор спортивнай оонньуулара буолуохтарын иннинэ, куораты көҕөрдүү-тупсарыы үлэтигэр кыттан, биhиги Строителей 8 аадырыска, технологическай институт (ЯГИТИ), иннигэр киэҥ сир таах турар: бөх-сах, туох да үүммэккэ турарын көрө сылдьан «Бу манна, үчүгэй киэҥ сиргэ профтех үөрэхтээhин ветераннарыгар искибиэр буолуон сеп эбит диэн директор Николай Григорьевич Худолийга эппитим . Куоракка оннук суох, онон манна оноруохха сөбүн биллэрбитэ, билигин кини суох. Урукку ЯГИТИ билигин колледж инфраструктурных технологий буолан турар. Ити курдук, 2016 сыллаахха мин этиибин Елена Николаевна өйөөн, директор Алексей Михайлович Бессмертнайга киирэн билиhиннэрэн, ол сайын искибиэр үлэтэ саҕаламмыта. Строительнай уокуруг социальнай салаатын начальнигын солбуйааччыта Николаева Елена Николаевна уу сытар хаспаҕар 2 камаз кумах куттарбыта. Саамай тутуу үлэһиттэрэ студеннар буолбуттара клумба оҥоруутугар кытта көмөлөспүттэрэ. Дьэ, ол сыл күһүнүгэр балаҕан ыйын 16 күнүгэр искибиэрбит үөрүүлээх аһыллыыта буолбута. Орто анал үөрэхтээhин тэрилтэлэрин ветераннара ыҥырыллан кыттыны ылбыттара. Студеннар мустан сэргэх кэнсиэр көрөн ветераннар астыммыттара. Орто анал үөрэхтээһин департаменын начальнига Заморщиков Иннокентий Петрович өрө көтөҕүүлээх тыл эппитэ.
-Искибиэргэ тугу олордоҕут?
— Ботаническай садка өр сылга үлэлээбит бииргэ үөрэммит – Вера Варилова сүбэлээн 4 тыhыынчаҕа бузина атыылаhан олордубуппут. Онон кэнники сылларга биhиги күһүн, саас аайы субуотунньуктары оҥорон, уу кутан, көҕөрдүү үлэтин ыытабыт. Сорох ветераннар бэйэлэриттэн баҕа өттүлэринэн аҕалан акациялары олордубуттара. Холобур, Николаева Мария Николаевна бэйэтин дачатыттан аҕалан олордубута. Мин кэргэмминээн Михаил Гаврильевичтыын 7 яблоня үүннэрбиппит. Савва Анатольевич Михайлов баар эрдэҕинэ искибиэри өйөөн бэйэтин массыынатынан «Ботаническай Садтан» үүнээйилэри аҕалара. Оччоттон баччаҕа диэри бэс ыйын 5 күнүгэр хаhан да көтүппэккэ Аан дойдутааҕы Айылҕа харыстабылын уонна экологтар күннэригэр олох улахан бырааhынньык тэрийэммит, ветераннар кэлэн, бары рассада аҕалан олордон,астынан тарҕаһабыт. Кэлин уокуруг өйөөн, депутаттара көмөлөһөн, үлэ син биир бара турар. Ону таһынан втераннар манна кэлэн сынньанан, остуол оонньуутугар күрэхтэһэн, ким тугу билэринэн уопут атастаһан сэргэхсийэн барабыт.
Дьокуускай куорат орто-анал үөрэхтээһин тэрилтэлэрин бэтэрээннэрэ Строительнай уокурукка баар сквердэри тупсарар, сайыннарар баҕалаах Олохтоох инициативаны өйүүр бырагыраама сүүмэрдиир куонкуруһугар кыттаары мунньахтаатылар. (Программа поддержки местных инициатив граждан ППМИ) Сквердэригэр Үтүөлээх үлэһиттэрин ааттарын үйэтитэр стендэ, олорор, дьарыктанар беседка, отонноох сэдэх үүнээйилэри олордор, тарҕатар сыаллаах питомник оҥорорго быһаардылар. Өссө күүскэ бырайыак суруйаммыт кыттыахпыт, дьиҥэр Федеральнайга даҕаны, президент грантыгар да кыттыахпытын сеп этэ диэн баҕа санаалааҕын биллэрдэ. Ити курдук, Анна Афанасьевна баҕа санаатын кэпсээтэ.
Кэпсэттэ Ньургуйаана Скрябина
ПОДЕЛИТЬСЯ: