Саха сириттэн 8-с киһинэн Арассыыйа Дьоруойун аатын ылбыт Таатта улууһун Туора Күөлүттэн төрүттээх Родомир Максимов – Бурхаат дойдутугар кылгас уоппускаҕа алтынньы 9 күнүгэр көтөн кэлбитэ. Ойуунускай аатынан аэропуорка кинини Ил Дархан уонна СӨ бырабыытылыстыбатын дьаһалтатын салайааччыта Г.Н. Михайлов, Таатта улууһун баһылыга А.С. Бурцев, аймахтара, биир дойдулаахтара уо.д.а. көрсүбүттэрэ. Ол кэнниттэн Бокуруоп күн Дьокуускайга Ил Дархан Айсен Николаев өрөспүүбүлүкэ сүрүн саалатыгар – Овальнай саалаҕа Дьоруой Родимир Максимов – Бурхааты чиэстиир тэрээһиҥҥэ кыттыыны ылан эҕэрдэлээбитэ. Ил Дархан бу көрсүһүүгэ 1500000 солк. сууммалаах сертификаты Дьоруойга туттарбыта. Родомир Максимов төрөөбүт төрүт буоругар итии-истиҥ көрсүһүүлэрин норуот киэн туттар киһитин, биллиилээх Б.Ф. Неустроев – Мандар Ууһу кытары көрсүһүүттэн саҕалаабыта. Ол кэнниттэн Дьүлэй нэһилиэгиттэн төрүттээх Арассыыйа Дьоруойа Р. Д. Максимов Ытык Күөлгэ «Иллээх-эйэлээх дьиэ кэргэн» диэн пуорумҥа кыттыбыта. Бу Арассыыйаҕа «Дьиэ кэргэн сыла», өрөспүүбүлүкэбитигэр «Оҕо саас», дойдутугар Тааттаҕа «Таптал Эрэл Итэҕэл» сылларынан сибээстээн илин эҥэр улуустарга ыытыллыбыт пуорумҥа Бурхаат ийэтинээн В.Н. Максимовалыын мустубут дьон иннигэр тыл этиилэрэ дохсун ытыс тыаһынан доҕуһуолламмыта. Киинэ түспүт Туора Күөлүгэр Бурхааты биир дойдулаахтара үөрэ-көтө көрсүбүттэрэ, ааспыты ахтыспыттара, инникитин өссө үрдүк ситиһиилэри уолларыгар баҕарбыттара. Ити курдук Арассыыйа Дьоруойа Родомир Дмитриевич Максимов – Бурхаат Ытык Күөлгэ, Чурапчыга олохтоохтору кытары көрсүһүүлэрэ үрдүк таһымҥа аастылар.
Надежда Аргунова
ПОДЕЛИТЬСЯ: