Бүгүн, алтынньы 25 күнүгэр, Дьокуускай куорат Хомсомуол болуоссатыгар үгэскэ кубулуйбут «Рыба Якутии» (Саха сирин балыга) атыы-эргиэн дьаарбаҥката үлэтин саҕалаата. Булун, Усуйаана, Аллайыаха, Аллара Халыма уонна Кэбээйи улуустарыттан уопсайа 26 тэрилтэ кэлэн кыттыыны ыла сылдьар. Тэрээһин үс күн устата алтынньы 25-27 күннэригэр 10:00ч-17:00ч диэри үлэлиэҕэ.
Сыана араастаан халбаҥныыр. Усуйаана күндүөбэйэ – 1 кг. 250 солк., оттон Булун киэнэ – 300 солк. тэҥнэһэр. Майаҕас уонна быраҥаатта орто сыаната 400 солк. буолбут. Муҥуру биир киилэтиттэн 500-750 солкуобайга атыылыыллар. Оттон тууччаҕы уонна хатыыһы 1200-1500 иһинэн булуохха сөп. Балык арааһа дэлэй – буспут, тоҥоруллубут, саарыламмыт, хаппыт, ыыһаммыт онтон да араастаан бэлэмнэммит балыгы кэлэн көрүөххүтүн, ылыаххытын сөп. Атыылааччылар сыана чэпчэки эрдэҕинэ атыылаһыҥ диэн сүбэлииллэр, мантан кыһын хоту эҥэртэн ыарахан сыанаҕа тастаралларын санаталлар, саҥа дьылга диэри сыана ыарыыр чинчилээх.
Дьаарбаҥкаҕа атыы күргүөмнээхтик ыытыллар, дьон тутан-хабан, сыттаан-сымардаан ким араас ньымалааҕынан көрөн талаллар. Сорох-сорохтор уһун кыһын устата сиир балыктарын ылыналлар, кимнээх эрэ амтаһыйаары эрэ атыылаһаллар.
Варвара Эверестова, Дьокуускай куорат олохтооҕо: «Мин бэйэм Кэбээйиттэн төрүттээхпин, балыгынан аатырбыт сиргэ төрөөбүт буоламмын балыгы сиирбин туохтааҕар да ордоробун. Дойдум балыга кэлэн астыныы бөҕө, бүгүн киэһэ хайаатар да сибиэһэйдии буһарынан сиэхтээхпин. Балык арааһыттан атыыластым, саатар сылга биирдэ үчүгэй, күндү балыгы сиэхтээх буоллахпыт дии. Сыана боппуруоһугар эттэххэ сөптөөх курдук. Бэйэм финансист быһыытынан өйдүүбүн. Күн ахсын уматык сыаната, саппаас чаас үрдүү турар, балыксыттар кыһыл илиилэринэн хаһан, ууну буккуйан үлэлииллэр, аны итиччэ ыраах сиртэн тиэйиллэн кэлэрэ барыта уустук уонна элбэх үбү эрэйэрин билэбин уонна өйдүүбүн. Ханна да ыраах барбакка, бачча кэлэн атыылыылларыгар кэлэн атыылаһар ордук».
Сарсын, алтынньы 26 күнүгэр, тоҥ балыгы кыһан дьоҥҥо-сэргэҕэ атыылыахтара. Киирбит үбү-харчыны анал байыаннай дьайыыга кытта сылдьар байыастары өйүүргэ ыытыахтара.
Айтал Павлов
ПОДЕЛИТЬСЯ: