Бороҕон нэһилиэгэр «Түмсүү» сынньалаҥ киинигэр, үгүс көлүөнэ ыччаты билиигэ уһуйбут, кэргэннии учууталлар, Бороҕон нэһилиэгин бочуоттаах олохтоохторо, тыыл, педагогическай үлэ ветераннара Александра Ивановна, Александр Семёнович Бурцевтар 90 сылларыгар анаан, кинилэр дьоһун олохторун, үлэлэрин, дьарыктарын, сырдык ааттарын үйэтитэн, «Сырдыкка, үтүөҕэ уһуйбут дьоһун олох» кинигэни Арассыыйаҕа дьиэ кэргэн, Өрөспүүбүлүкэҕэ Оҕо саас сылларынан уонна 2023 сылга Арассыыйаҕа Учуутал-наставник, Өрөспүүбүлүкэбитигэр Үлэ сылларын чэрчитинэн, оҕолоро, кэнчээри ыччаттара ахтыы хомуйан, бу үйэлээх кинигэни таһааран, биһирэмэ ыытылынна.
Кинигэ сүрэхтэниитигэр нэһилиэкпит олохтоохторо, бэтэрээн учууталлар, В.М. Прокопьев аатынан Тумул орто оскуолатын педколлектива, үөрэнээччилэрэ, биир дойдулаахтарбыт сырыттылар. Саха балаҕаныгар аҕам саастаахтар кэлбит ыалдьыттары үүттээх чэйинэн, арыылаах алаадьынан көрүстүлэр. Ол курдук, Дьокуускай куораттан, Булуҥ оройуонун Бороҕон нэһилиэгиттэн төрүттээх, үөрэппит үөрэнээччилэрэ Өрөспүүбүлүкэтээҕи гериатрическай клиника сэбиэдиссэйинэн өр сылларга, олус эппиэттээх үлэҕэ таһаарыылаахтык үлэлээбит, РФ уонна СӨ үтүөлээх бырааһа, «Гражданскай килбиэн» бэлиэ кавалера, медицина бочуоттаах бэтэрээнэ Зоя Прокопьевна, СӨ бочуоттаах тутааччыта, бэтэрээнэ Вячеслав Михайлович Гороховтар дьиэ кэргэттэрэ, Дьокуускай куораттан бииргэ алтыһан үлэлээбит, РСФСР үөрэҕириитин, СӨ ыччат политикатын туйгуна Елена Петровна Аммосова, уруу-аймах дьонноро Бороҕонтон Уус Алдан улууһун уонна Мүрү нэһилиэгин бочуоттаах олохтооҕо, үлэ бэтэрээнэ, сэрии оҕото Матрена Семёновна, Бэрт-Ууһун нэһилиэгин бочуоттаах олохтооҕо, спорт, үлэ бэтэрээнэ Николай Васильевич Москвитиннар, Суотту нэһилиэгиттэн ытык бэтэрээн учууталлар Татьяна Семёновна, Иван Иванович Пирожковтар кыыстара, СӨ доруобуйатын харыстабылын туйгуна, Суотту нэһилиэгин бочуоттаах олохтооҕо, РФ үлэҕэ бэтэрээнэ Татьяна Ивановна Тарасова-Пирожкова, Суотту нэһилиэгин бочуоттаах олохтооҕо, Суотту модельнай сельскай библиотекатын сэбиэдиссэйэ Раиса Николаевна Черкашина ытыктабыллаах ыалдьыттарынан буоллулар.
Фойеҕа «Учуутал, эн үрдүк ааккар» Тумул орто оскуолатын, нэһилиэк музейын матырыйааллара уонна кэргэннии учууталлар А.И., А.С. Бурцевтар тустарынан матырыйааллар, А.Р. Халдеева аатынан модельнай библиотека фондатыттан кинигэ быыстапката, Бурцевтар педагогическай династияларын көрдөрөр выставочнай стеллаж турда. Быыстапканы туруордулар: оскуола педагог-библиотекара Стрекаловская Сардаана Иннокентьевна, нэһилиэк библиотекара Прудецкая Светлана Александровна.
Кинигэ презентациятын аһыллыытыгар, бастакынан тыл бэрилиннэ Бороҕон нэһилиэгин дьаһалтатын баһылыгар, Уус Алдан улууһун бочуоттаах олохтооҕор, СӨ ыччат политикатын туйгунугар Василий Петрович Алексеевка. Олохтоох дьаһалта аатыттан эҕэрдэ сурук, өйдөбүнньүк туттарылынна. Улуус кииннэммит библиотечнай тиһигин дириэктэрин Иван Данилович Копырин эҕэрдэтин, өйдөбүнньүк кинигэтин туттарда, Суотту модельнай библиотекатын сэбиэдиссэйэ Раиса Николаевна Черкашина.
Раиса Николаевна «Суоттум кэрэхсэнэр дьоно» кинигэни Бороҕон нэһилиэгин библиотекатыгар бэлэхтээтэ.
Олус истиҥ эҕэрдэлэрин тиэртилэр өйдөбүнньүктэри туттардылар нэһилиэк тэрилтэлэрэ: В.М. Прокопьев аатынан Тумул орто оскуолата − дириэктэр Константин Михайлович Копырин, «Түмсүү» сынньалаҥ киинин кэлэктиибэ − дириэктэр Анастасия Егоровна Сухонина. Биир кэлэктиипкэ өр сылларга, бииргэ алтыһан үлэлээбит РСФСР үөрэҕириитин туйгуна, Учууталлар учууталлара, Бороҕон нэһилиэгин бочуоттаах олохтооҕо Зоя Ивановна Протопопова, күндү ыалдьыттар, бэтэрээн учууталлар, үөлээннээхтэрэ, үөрэнээччилэрэ сылаастык ахтан-санаан аастылар.
Эҕэрдэ ырыалары бэлэхтээтилэр култуура үлэһиттэрэ Андрей Макаров, Василий Копырин.
«Удьуор утум салҕанар» талба талааннаах, уран тарбахтаах учуутал, бочуоттаах сынньалаҥҥа тахсан баран иһинэн утумнаахтык дьарыктаммыта Александра Ивановна Бурцева уустаан-ураннаан тикпит, дьэрэкээн оҥоһуктарын сценаҕа хааман көрдөрдүлэр, оскуола үөрэнээччилэрэ, аҕам саастаахтар түмсүүлэрэ, оскуола алын сүһүөх кылааһын учууталлара. Уус-уран быыстапканы туруорда кыыһа Светлана Прудецкая.
Кинигэ презентациятын «Олбохтоох үҥкүүнэн түмүктээтилэр» аҕам саастаахтар үҥкүүһүттэрин бөлөҕө. «Сырдыкка, үтүөҕэ уһуйбут дьоһун олох» кинигэ сүрэхтэниитин салайан ыыттылар А.Р. Халдеева аатынан Бороҕон модельнай сельскай библиотекатын сэбиэдиссэйэ Светлана Прудецкая, Суотту модельнай сельскай библиотекатын сэбиэдиссэйэ Раиса Черкашина. Кэлбит ыалдьыттар, нэһилиэк олохтоохторо тэрээһини үрдуктүк сыаналаатылар.
В.М. Прокопьев аатынан Тумул орто оскуолатын
педагог-библиотекара Сардаана Стрекаловская, Тумул.
ПОДЕЛИТЬСЯ: